ഇവിടെ ആരും ഇല്ലേ..?? ആരും ഇല്ലേ എന്നാണ് ചോദിച്ചത്.. !!
ശബ്ദം കേട്ട് ഞാന് ഉച്ച മയക്കത്തില് നിന്നും ഞെട്ടി ഉണര്ന്നു. മാമ്പഴ പുളിശ്ശേരിയും, മീന് കറിയും കൂട്ടി കുശാലായി ചോറുണ്ടിട്ട് ഒന്ന് മയങ്ങാന് കിടന്നപോഴേക്കും ശല്യം ചെയ്യാന് വന്നവനെ പ്രാകിക്കൊണ്ട് ഞാന് വാതില്ക്കല് ചെന്ന് ആരാണ് എന്ന് നോക്കി. അതാ വാതില്ക്കല് മനു അണ്ണന് .
"ങാ മനു അണ്ണന് ആയിരുന്നോ? എന്താ വിശേഷിച്ച്?"
"ഞാന് നിന്നെ കണ്ടു രണ്ടു വര്ത്തമാനം പറയാന് വന്നതാ" .. എന്റെ ഉള്ളൊന്നു കാളി. ഈശ്വരാ ഞാന് ഇങ്ങേരുടെ കയ്യില് നിന്നും വല്ലോം കടം വാങ്ങിയാരുന്നോ ?.. ഇല്ലെന്നാണ് എന്റെ ഓര്മ. ഇനി രണ്ടു ദിവസമായി മിസ്ഡ് കോള് അടിക്കുന്ന ആ പെങ്കൊച്ചു മനു അണ്ണന്റെ ആരെങ്കിലും ആയിരിക്കുമോ.. ഏയ് അവള് പാലക്കാട് ഏതോ തീരപ്രദേശത്ത് ആണ് വീട് എന്നലേ പറഞ്ഞത്, അപ്പൊ അതും ആവില്ല. പിന്നെ ഇനി ഇന്നലെ റോഡില് കൂടി പോയ ആ പട്ടു പാവടാക്കാരി പെണ്കുട്ടി മനു അണ്ണന്റെ ആരെങ്ങിലും ആയിരുന്നിരിക്കുമോ? പടച്ചോനെ...!! ആണെങ്ങില് പണി പാളി..!!
മേല് പറഞ്ഞ പാവാടക്കാരിയുടെ കേസ് തന്നെ ആണ് എന്ന് മനസ്സിലുറപ്പിച്ചു ഞാന് വിക്കി വിക്കി പറഞ്ഞു തുടങ്ങി, " അത്... പിന്നെ..മനു അണ്ണാ..ഞാന് ഞാനല്ല.. സത്യമായിട്ടും ഞാനല്ല...!! "
"എന്തോന്ന്..?? നീ നിയല്ലേ..?? പിന്നെ നീ ആരാ..???എന്തുവാടാ നട്ടുച്ചയ്ക്ക് പിച്ചും പേയും പറയുന്നത്..? ഞാന് നിന്നോട് നിന്റെ ബ്ലോഗേഴുത്തിനെ കുറിച്ച് പറയാന് വന്നതാ "
ഹോ..!! എന്റെ ശ്വാസം നേരേ വീണു. പങ്കജകസ്തുരിയുടെ പരസ്യത്തില് ലാലേട്ടന് Breath Easy എന്ന് പലവട്ടം പറയുമ്പോഴും ഞാന് ആലോചിച്ചിട്ടുണ്ട് Breath Easy എന്ന് പറയുന്നത് Grammatically തെറ്റല്ലേ എന്ന്. ചിലപ്പോ ഇങ്ങനെ ശ്വാസം നേരേ വീഴുന്ന അവസരങ്ങളെ അങ്ങനെയും പേരിട്ടു വിളിക്കുമായിരിക്കും.
"ബ്ലോഗേഴുത്തിനെ കുറിച്ചോ..? ഞാന് അതിനെ ആകെ പാടെ ഒരു തവണ അല്ലേ എന്റെ ബ്ലോഗില് പോസ്റ്റ് ചെയ്തോള്ളൂ അത് ഒരു തെറ്റാണോ?"
" അതേ, അതൊരു തെറ്റാണു.. നീ ഈ പരിപാടി ഉടനെ എങ്ങും നിര്ത്തില്ല എന്നല്ലേ നിന്റെ ആദ്യത്തെ ബ്ലോഗ്ഗില് പറഞ്ഞത്, സമൂഹത്തിനെ സേവിക്കണം, മല മറിക്കണം, അറബികടല് കുടിച്ചു വറ്റിക്കണം..എന്തൊക്കെയാരുന്നു എന്നിട്ട് വല്ലതും നടന്നോ?? എടാ ആണുങ്ങളായാല് പറഞ്ഞ വാക്കിനു വില വേണം."
അപ്പൊ പെണ്ണുങ്ങള്ക്ക് തോന്നിയത് പോലെ ജീവിക്കാം എന്നാണോ എന്ന് ചോദിക്കെണം എന്നുണ്ടായിരുന്നു,ചോദിച്ചില്ല .
"അത് പിന്നെ അണ്ണാ, കോളേജ് അവസാനിക്കുന്നതിന്റെ തിരക്കും, പരീക്ഷയും ഒക്കെ ആയതുകൊണ്ട് സമയം കിട്ടിയില്ല. "
"എടാ ഈ സമയം എന്ന് പറഞ്ഞാല് നീ വാടകയ്ക്ക് വിളിച്ച ടാക്സി ഒന്നുമല്ല നിന്റെ സൌകര്യത്തിനു നിര്ത്താനും കേറി പോകാനും, വേണം എന്ന് വിചാരിച്ചാല് ഈ ലോകത്ത് ചെയ്യാന് പറ്റാതതായിട്ടു ഒന്നുമില്ല."
"എന്നാ പിന്നെ ബിന് ലാദേനെ വേണം വേണം എന്ന് അമേരിക്ക വിചാരിച്ചിട്ട് എന്താ കിട്ടാത്തത്..??"
അതോടു കൂടി മനു അണ്ണന്റെ വാ അടഞ്ഞു. അണ്ണന് ഒന്നും മിണ്ടാതെ തിരിഞ്ഞു നടന്നു. ഒരു പത്തടി മുന്നോട്ടു നടന്ന ശേഷം അണ്ണന് ഒന്ന് തിരിഞ്ഞു നോക്കി മന്ദഹസിച്ചു, വീണ്ടും നടന്നു.
അടുത്ത ദിവസത്തെ പത്രത്തിന്റെ തലക്കെട്ട് കണ്ടു ഞാന് ഞെട്ടി, - 'ഉസാമ ബിന് ലാദേന് കൊല്ലപ്പെട്ടു'.
അങ്ങനെ ഞാന് എന്റെ ബ്ലോഗെഴുത്ത് പുനരാരംഭിക്കാന് തീരുമാനിച്ചു.
No comments:
Post a Comment